Cancer Council

Третманот за рак, негативните ефекти, лузните од хирургија и промените во телесната тежина може да влијаат врз Вашето мислење за себе. Следните стратегии може да бидат корисни:

• Дајте си време за да се приспособите на какви било промени.
• Размислувајте за себе како цела личност, која се состои од тело, ум и карактер.
• Разговарајте со Вашиот лекар во врска со реконструктивна хирургија или користење на вештачки дел од телото (протеза).
• Разговарајте со Вашиот социјален работник, психолог или советник.
• Побарајте поддршка од луѓе во слична ситуација или приклучете се на група за поддршка.
• Учествувајте во активности, како спорт, сликање, музика или занаетчиство, кои може да ја зголемат Вашата самодоверба.

Сексуалноста е поврзана со тоа кој сте, што мислите за себе, како се изразувате сексуално и Вашите сексуални чувства кон другите. Сексуалноста се разликува од човек до човек и врз неа влијаат различни фактори, вклучително религијата, културата, возраста и ситуацијата.

На сличен начин, сексуалноста се изразува на многу начини според облеката која ја носите, начинот на кој се движите, како се дотерувате. Сите ние сме сексуални битија и ако сме заболени од рак, независно дали имаме партнер или не, не го менува тоа.

Интимноста значи да се биде физички и емоционално близок со некој друг и значи да сакате и да бидете сакани. Таа се изразува на различни начини – со лични разговори, споделување на значајно искуство или преку физичка привлечност.

Ракот влијае врз сексуалноста и интимноста на физички и емоционални начини. Навременото справување со промените може да Ви помогне Вам и на Вашиот партнер полесно да се приспособите.  Разговарајте со Вашиот општ лекар или социјален работник, за да Ви дадат насоки за специфични проблеми кои можете да ги имате.